Urola Kostako Hitza

2008-05-09 | 17:37:27

Jon Sudupek irabazi du bigarrenez Unamuno saria

Saiakera sariaren euskarazko atalean gailendu da azkoitiarra, ‘Hizkuntza ados jartzeko da’ lanarekin

Jon Sudupek irabazi du aurtengo Miguel Unamuno Saiakera sariaren euskarazko atala, Hizkuntza ados jartzeko da lanarekin. Bilboko Udalak antolatzen duen lehiaketan bigarrenez gailendu da azkoitiarra, 2004an ere berak irabazi baitzuen, Kant eta uso arina liburuarekin. Sudupek Hizkuntza ados jartzeko da saiakeran azaltzen duenez, hizkuntzak pertsonen arteko harremanak ulertzeko eta munduaren ikuspuntu bat sortzeko beharrezko tresna dira.

Ez du erantzunik

2008-05-08 | 17:02:14

Bihar hasiko dira Martitte auzoko Pentekoste jaiak

Martitte jatetxeak bost eguneko egitarau zabala prestatu du

Bihar (ostirala) hasi eta datorren maiatzaren 13a bitartean, Pentekoste Jaiak ospatuko dituzte Martitte auzoan. Azkoitiko auzorik trikitizaleena, erromeria eta euskal giroan murgilduko da bost egunez. Martitte Jatetxeak Azkoitiko Udalaren laguntzarekin antolatu duen egitarau zabalean, bertsolaritza, musika, elizkizunak eta gastronomia izango dira protagonista. Igandean, Zumarragako Trikitixari egingo dioten omenaldiaz gain, Azkoitiko hainbat trikitilariren saioak entzuteko aukera izango da Martitten, hala nola, Kupela taldea edota Imuntzo eta Beloki.

• EGITARAUA

Ez du erantzunik

2008-05-06 | 17:09:25

Maiatzaren 8tik 10era egingo dituzte Bebarruko Jardunek, Matadeixen

Esperimentaziorako hainbat proposamen ekarriko dituzte Italiatik

Behin ere baino esperimentalago dator aurtengo Bebarruko Jardunek ekimena. Jolaserako eta eraldaketarako gogoz daudenak Matadeixen dute hitzordua, bihar hasi eta larunbata bitartean. Soinua, irudia eta hainbat ikuskizun berezirekin osatu du egitaraua Matadero Ekintzak taldeak. Horretarako, Italiatik etorritako lagun talde baten laguntza izango dute. Stefano de Angelisek, Antonio Tremanik, Gabriele Serinik, Marcello Liberatok, Gianmarco Serrak eta Alex Mendizabalek sorkuntza lantzeko hainbat proposamen aurkeztuko dute Azkoitiko jaialdian.

• Egitaraua

Ez du erantzunik

2008-04-30 | 12:30:58

Floreaga Salestar Ikastetxeko ikasle ohien festa maiatzaren 17an izango da

Meza eta lagunarteko afaria egingo dute

Orain hiru urte antolatutako ekimena berreskuratu asmoz, Floreaga Salestar Ikastexeak ikasle ohi gazteen topaketa egin nahi du datorren maiatzaren 17an. Larunbat horretarako meza eta lagunarteko afaria antolatu dute. 20:00etan izango da elizkizuna, Floreagako elizan. Ondoren, 21:00ak aldera, afaria egingo dute Joseba jatetxean. Parte hartu nahi duten ikasle ohiek, izena eman eta 20 euro ordaindu beharko dituzte, Floreaga Ikastetxeko idazkaritzan. Maiatzaren 9a arte zabalik egongo da epea. «Parte hartzera animatzen zaituztegu, eta mezua beste ikasle ohiei jakinaraztea eskatzen dizuegu», adierazi dute antolatzaileek.

Ez du erantzunik

2008-04-29 | 17:19:12

Iñigo Aranbarriren 'Zulo bat uretan', euskarazko libururik salduena Donostiako Liburu Azokan

Zilarrezko Euskadi saria jasoko du idazle azkoitiarrak

Iñigo Aranbarriren Zulo bat uretan nobela izan da aurten Donostiako Azokan euskarazko libururik salduena. Horrenbestez, Zilarrezko Euskadi saria jasoko du. Haren atzetik Joxerra Gartziaren Jendaurrean hizlari kokatu da. Nolanahi ere, liburu saltzaileak kezkatuta agertu dira, apirilaren 23an, Liburuaren Egunean, Donostian egiten den azokan euskarazko gero eta liburu gutxiago saltzen direlako. Gaztelerazkoetan Carlos Ruiz Zafonen El juego del angel izan da salduena

Ez du erantzunik

2008-04-28 | 18:05:11

Azkoitiak Gipuzkoako Odol Emaile Elkartearen 'Zilarrezko Odol Tanta' saria jaso du

Urtean 1.000 biztanleko 50 odol emanaldi baino gehiago egiten dituzten udalerriei ematen diote saria

Gaur goizean Asier Aranbarrik, Azkoitiko alkateak, 'Zilarrezko Odol Tanta' jaso du Gipuzkoako Odol Emaileen Elkartearen eskutik. Sari hau urtean mila biztanleko 50 odol emanaldi baino gehiago egiten dituzten udalerriei ematen zaie. Aurtengoan Azkoitia izan da muga hau gainditu duen herrietako bat eta Asier Aranbarrik ekitaldian eskerrak eman nahi izan dizkie odol emaile diren azkoitiar guztiei: "Harrotasunez jasotzen dut sari hau, beste behin ere, azkoitiarren elkartasun izpiritua islatzen duelako. Herritar askori esker odol emaileen bankua hazi egiten ari da eta hortan jarraitu behar dugu. Hemendik gazteak, batik bat, animatu nahiko nituzke odol emaile egin daitezen, hau baita odol emaile gutxien dituen taldea".

6 erantzun

2008-04-21 | 14:33:44

Bihar abiatuko dira Floreagako XIX. Kultur Jardunaldiak

Apirila eta maiatza bitartean, hiru hitzaldi egingo dituzte On Bosco aretoan

"Azkoitia eta Urola bailara: etorkizuneko erronkak" izeneko hitzaldiarekin hasiko dira aurtengo jardunaldiak. Azkoitiko alkate Asier Aranbarrik eta Iraurgi Lantzeneko zuzendari Jesus Agirrek egingo dute lehen solasaldia. Maiatzaren 6an, asteazkenez, egingo dute bigarren hitzaldia. "Gipuzkoako Eliza: ekarpenak eta erronkak" gaiari buruz hitz egingo du Patxi Aizpitartek, Donostiako Bikarioak. Maiatzean, oraindik zehaztu gabe dagoen egun batean, Migel Indurain txirrindulari handiak bisitatuko ditu jardunaldiak, eta "El mundo del ciclismo" gaitzat hartuta, txirrindularitza zaletuekin elkartzeko aukera izango du.

Ez du erantzunik

2008-04-17 | 16:42:11

Baterak ez du parte hartuko Udaleko ezohiko bilkuretan eta kontseiluetan

Talde independienteak, Udal Gobernuaren jarrerarekin ados ez dagoelako hartu du erabakia

Batera Talde Independientea Azkoitiko Udal Gobernuaren jarrerarekin (EAJk eta PSE-EEk osatzen dute) ez dago ados, eta hemendik aurrera zer jarrera izango duen erabaki zuen atzo, ezohiko batzarrean. Udalean lanean jarraituko duela erabaki du Baterak, baina Udaleko ezohiko bilkuretara eta kontseiluetara ez da joango. «Batzarrean bi jarrera nabarmendu ziren taldeko kideen artean eta esan dezakegu erdibideko irtenbidea onartu zela», azaldu dute Baterako kideek. Talde independientearen batzarrean nabarmendutako jarrerak honakoak izan ziren: «Batetik, Udala utzi eta udaletxez kanpo lanean hastea eta bestetik, Udalean jarraitu baina ezohiko bilkuretara eta kontseiluetara ez joatea». Batzarkideek bi ikuspuntuak aztertu zituzten, «bakoitzaren alde onak eta txarrak aztertuz». Bigarren ikuspuntua nagusitu zen, baina udaletxean lan egiteko modua aldatuz. Baterakoen esanetan, erdibideko jarrera bat hartzeko erabakia hartu zuten.

Ez du erantzunik