Urola Kostako Hitza

2009-07-02 | 14:13:45

Pablo Turrillas da Anaitasunako talde nagusiaren entrenatzaile berria

Anaitasunako Zuzendaritza Batzorde berriak atzo aurkeztu zuen, Txerloian

Pablo Turrillasek (Deba, 1963) zuzenduko du Anaitasuna Futbol Taldearen lehen taldea. Debarra (argazkian eskuinean, Anaitasunako lehendakari Javier Zubizarreta alboan duela) futbol jokalaria izandakoa da eta hainbat talde entrenatzen ibili da azken 15 urtetan, hala nola, Ondarroako Aurrera, Durango, Gernika, Elgoibar eta Arenas Getxo. "Ilusioz beterik eta lanerako gogoz" dator Turrillas Azkoitira eta helburu nagusi bat duela: "Anaitasuna mailaz igotzea".

Ez du erantzunik

2009-07-01 | 10:41:14

Inazio Uria zenari emango diote Antonio Oteiza Fundazioaren Ekintzailearen I. Saria

Ostiralean, uztailaren 3an, 11:00etan izango da ekitaldia Antonio Oteiza Gunean

Antonio Oteiza Fundazioak ETAk iazko abenduaren 3an hil zuen Inazio Uria enpresaburu azpeitiarrari emango dio sortu berri duen Ekintzailearen Saria. Ekitaldia datorren ostiralean egingo dute, Azkoitiko Aingeru Kalearen 32.ean dagoen Antonio Oteiza Gunean. Sari banaketaren ondoren, Antonio Oteizaren arte eriljiosoaren erakusketa irekiko dute bertan.

Ez du erantzunik

2009-06-30 | 15:07:40

Oñartxon hildako langilearen ezbeharra ikertzeko eskatu du ELAk

Lan istripua gertatu zen tokian elkarretaratzea egin dute heriotza salatzeko

Joan den ostiralean Oñartxo industrigunean eraikuntza lanetan ari zen 20 urteko langilearen heriotza salatu du gaur ELA sindikatuak. Ezbeharra gertatu zen tokian egin du bilkura sindikatuak, "Lan istripu gehiagorik ez" lelopean. ELAk heriotzaren arrazoiak argitzeko ikerketa sakona egiteko eskatu du, segurtasun arauak ondo bete al ziren frogatzeko. Hildako langilea Construcciones Amenabar enpresak azpikontratatutako Construcciones y Contratas Pontegal SLU enpresarentzat ari zen lanean.

Ez du erantzunik

2009-06-29 | 16:57:51

Gros Xake Taldeak irabazi du XXVII. Azkoitiko Hiria Xake Txapelketa

18 talde lehiatu ziren, atzo, Kontzejupean

Iazko garaipena errepikatuz, Donsotiako Gros Xake Taldeak irabazi du XXVII. Azkoitiko Hiria Xake Txapelketa. Atzo jokatu zen lehiaketa, Kontzejupean, partida azkarretara. «Maila oso altuko taldea du Grosek eta aukerarik ez die eman gainontzeko taldeei»,esan du torneoa antolatu duen Anaitasuna Kakuta Xake Taldeko lehendakariak, Jose Luis Fernandezek. Guztira, 72 jokalari aritu dira lehian aurtengo txapelketan, 18 taldetan banatuta. Giro «bikaina» izan zen Kontzejupean, atzo goizean. Groseko xakelariek (Santi Gonzalez de la Torre, Iñigo Argandoña, Miriam Muñoz eta Galder Salterain) 60,5 puntu metatu zituzten goizean zehar jokatutako partida azkarretan, bigarren sailkatuei, Errenteriako taldeari, 4,5 puntuko aldea ateraz. Azkoitiko Anaitasuna Kakuta Xake Taldeak txapelketara aurkeztutako hiru taldetatik nagusiak lortu zuen emaitzarik onena, 8. sailkatuz.

Ez du erantzunik

2009-06-26 | 18:37:46

21 urteko langile bat hil da lan istripuan pala batek buruan jota

Tiago Daniel Dosanjos Sampayo da hil den behargina. Amenabar enpresak azpikontratatuta ari zen

Gaur eguerdian Azkoitian gertatutako lan-istripuan, 21 urteko langile bat hil da.Tiago Daniel Dosanjos Sampayo da hildakoa, eta Amenabar enpresak azpikontrata- tutako lantoki bateko kidea zen. Makina bat maneiatzen ari zela, pala batek buruan jota hil da, antza denez. Urola Kostako Hitzak jakin duenez, Eibarren bizi zen gaztea bere familiarekin.

Ez du erantzunik

2009-06-25 | 16:54:50

Bihar (ostirala) goizean zabalduko dute Elkargunea, kirol, kultura eta aisialdi gune berria

Ateak zabalik izango ditu igandea bitartean herritarrek instalazioak ezagutu ditzaten

Elkarguneak bihar zabalduko ditu ateak. Inaugurazio ofizialik egongo ez bada ere, ateak zabalik izango ditu igandea bitartean herritarrek instalazioak eta zerbitzuak gertutik ezagutu ditzaten. Bihartik aurrera, eta uztaila eta abuztua bitartean, 07:00etatik 12:30era eta 15:00etatik 21:00etara zabalik egongo da Elkargunea. Irailetik aurrera, berriz, 07:00etatik 21:00etara jarraian irekiko dituzte instalazioak. Azkoitiko Udalak adierazi duenez, «Elkarguneako helburu nagusia aisiaren kontzeptu berri bat bultzatzea izango da; bere baitan, kirola ez ezik, kulturaren esparrua eta esparru soziala uztartuko baititu». Elkarguneak bere baitan hartzen ditu, alde batetik, Zubi-Aurre eraikina (kiroldegiko zabalkuntza dena ) eta bestetik, ekainaren 12an zabaldu zituzten Ugarte-Igarako estali gabeko igerilekuak. Eraikin berriak, besteak beste, erakusketa aretoa, balio anitzeko gelak eta gimnasioa ditu. Gainera, iirailetik aurrera Spa, jacuzzia, sauna eta erlaxatzeko guneak izango ditu martxan. Baita eskalada-horma, futbol zelaia,padeleko pista eta saskibaloian jokatzeko hiru kantxa ere. Kontzertu eta hitzaldietarako gela, sukaldea, komunak eta taberna ere izango dira eraikinean. Kultura, gazteria eta aisialdi arloetan herriak dituen hainbat zerbitzu Zubi-Aurreko eraikinera lekualdatuko dituzte gainera. Hala nola, Udaleko Kultura Saila, Helduen Eskola, Abarketatxo Udal Ludoteka, KZgunea eta Gazte Informazio Bulegoa.

3 erantzun

2009-06-24 | 12:05:32

Azkoitiko ikastolaren aitzindariek jaso dituzte 2009ko Urrezko Dominak

Omenaldi ekitaldiaren ondoren San Joan sua piztu zuten, Balda Plazan

Maria Karmen Zubiaurre, Izaskun Alberdi, Gemma Larrañaga eta Maria Jesus Zubizarreta irakasleak omendu zituen, atzo (asteartea), Azkoitiko Udalak. "Herri mugimenduaren lau erakusle izateagatik eta euskara eta euskal kultura zabaltzeagatik" jaso dituzte Urrezko Intsiginak, Asier Aranbarri alkatearen esanetan. Azkoitiko ikastolaren sorreran lan eskerga egin zuten herritarrak gogoan izan zituzten omendutako lau irakasleak. Bidegile hauen 40 urteko lanaren aitortza izan zen atzo udaletxean egindako ekitaldia. Pello Larrañagak sortutako bideoa ikusi zuten ekitaldian parte hartu zutenek eta Raimundo Alberdik ikastolaren hastapeneko pasarteak gogora ekarri zituen, entzuleak hunkituz. Udaletxeko omenaldi ekitaldia bukatuta, Balda Plazara joan ziren omendutako lau irakasleak San Joan sua pizteko. Dantzarien, txistularien eta Musika Bandaren ikuskizunak jende ugari bildu zuen suaren inguruan, urteko gaurik motzena eta magikoena ospatuz.

Ez du erantzunik

2009-06-19 | 17:15:14

Zubiaurreko Tarifak Jaitsi herri ekimeneko kideak "etsita" daude Udalarekin bildu ondoren

Udalak iraila arte ez du deituko gaia eztabaidatzeko ez ohiko udalbatzarra

Zubiaurreko Tarifak Jaitsi herri ekimeneko kideek eta Udal Gobernu Taldeko ordezkariek Elkargunearen inguruan sortu diren desadostasunen inguruko bilera egin zuten, atzo. Herri ekimeneko ordezkariek Kontzejupean egin zuten batzar informatiboan eman zuten bileraren berri eta «etsita» azaldu ziren Udalarekin izandako elkarrizketaren ondoren. «Ezertarako ez du balio izan», dio herri ekimeneko kide batek. Asier Aranbarri alkatearekin eta Iosu Bastida alkateordearekin egin zuten bileran «jarrera itxia» somatu zietela adierazi dute. «Tarifak berrikusteko eskatu diegu eta horretarako bildu ditugun 2.000 sinadura aurkezteko asmoa azaldu diegu, ez ohiko udalbatzarra deitu dezaten», dio Zubiaurreko Tarifak Jaitsiko kideak. Baina iraila baino lehen udalbatzarrik ez dutela deituko jaso dute erantzun gisa. Asier Aranbarri alkateak jakinarazi duenez, «jendeak instalazio guztiak ezagutu eta baloratu arte ez dugu ez ohiko udalbatzarrik deituko». Kiroldegiaren gaineko ordenantzak sei hilabetez egongo direla indarrean eta geroago egokitzeko aukera badagoela ere esan du. «Familiako bonoetan egokitzaenak egin behar direla jabetzen gara baina tarifak egokiak dira eskaintzen diren zerbitzuetarako», esan du alkateak lasaitasuna eskatzen duen bitartean.

4 erantzun